Documentación ITS de Manuel Yebra, do Seixo (O Bolo) e Antonio Vázquez, de Ourense

Rexistro de falecemento de Manuel Yebra

Rexistro de entrada en Mauthausen de Manuel e Antonio

Documentación ITS José Rivada Novoa, de Ribela (Coles)

Entrada en Mauthausen 

Traslado a Gusen

Viaxe a Cuba

Documentación de ITS de José García Rodríguez, de Baltar, e Julio Rajó, do Carballiño

José García, rexistro morte

José García, Libro dos Mortos

Julio Rajo, rexistro da morte

Julio Rajó, entrada en Mauthausen

Documentación de ITS, de Eliberto Fernández Cid, de Santa Mariña de Augassantas (Allariz), e de Luis Iglesias Grande, de Currás (San Cibrao de Viñas)

Tarxeta persoal de Eliberto en Buchenwald

Relación de sobreviventes de Mauthausen

Ficha de Iglesias Grande en Mauthausen

Documentación de ITS de Isauro González Prada, de Castro Caldelas

Rexistro de entrada en Mauthasuen

Traslado a Gusen

Rexistro de falecemento

Libro dos mortos

Documentos de ITS sobre Jesús Vázquez Valdominos, de Cujás?

Entrada en Mauthausen

Rexistro da morte

Documentos do arquivo ITS de Antonio Villar Febrero, de Santomé (Cartelle)

Entrada en Mauthausen

Traslado a Gusen

Libro dos mortos de Mauthausen

Nicolás Rodríguez Pérez, de Albarellos de Monterrei

Este verán visitamos o campo de Dachau. Mirando o Libro dos Mortos, de casualidade, reclamou a miña atención o nome de Albarellos. Sentínme emocionado e sorprendido por ver escrito o nome da miña pequena aldea no primeiro campo de concentración construído polos nazis, sobre todo porque non tiña ningunha noticia desta persoa, de Nicolás. Non o atopei nin no Libro Memorial, nin en Nomes e Voces. Axitábame e atraíame a idea de que fose do meu Albarellos, pero tamén podía pasar, como ocorreu con Antonio Pérez, que nacera no Albarellos de Boborás.

Pedín información ao campo, demorando o momento de solicitar a partida de nacemento no rexistro civil. Non quería rachar coa posibilidade de que foramos veciños. Segundo esa información, que xa publicamos noutro artigo, o seu lugar de nacemento era Alvareles ou Albareles. Pensei nunha localidade dos territorios de fala catalá, pero non atopei ningunha con ese nome. Así que, despois de moitos meses de atrasalo, hai un mes decindinme, sen moita esperanza, a solicitar a partida de nacemento en Boborás e Monterrei. E así, confirmouse que nacera en Albarellos de Monterrei, fillo de José Domingo Ramos e Josefa Pérez Nieto. Agora toca buscar a familiares.

Nicolás naceu o 28 de outubro de 1898, e foi detido en Burdeos. Parece ser que residía en Vernay, no departamento do Ródano, e rexistrouse como oficinista. Seguramente pertenceu á Resistencia, sendo trasladado a Dachau, desde Toulouse, saíndo desta cidade o 3 de xullo de 1944, e chegando ao campo o 28 de agosto, co número 94272. Alí faleceu pouco despois, o 25 de febreiro de 1945.

Eladio Anxo

O noso traballo na páxina de La Sexta

https://www.lasexta.com/tribus-ocultas/artes/aquellos-gallegos-deportados-campos-exterminio-nazis-franquismo_201903055c80d9410cf247bf2e0061ba.html?fbclid=IwAR0_4F5VbFyMSmAh5fT5KNuzF8_V8u8qCAvTvuF-qCm4dY7nH0OTNQDCe7I

O galego 4049 de Mauthausen

Fermoso, moi fermoso, artigo de Manuel Rivas adicado ao noso deportado de San Miguel de Mones (Petín), Albino González González, co gallo da publicación das súas cartas, 'Cartas de noiva', por parte do seu fillo Jesús. Do ano 2008, cando aínda se publicaba a edición galega de El País. Alude Manuel a Juan González del Valle, como natural de Ourense. Juan era da Coruña e acabou a súa vida en Hartheim.

https://elpais.com/diario/2008/11/21/galicia/1227266306_850215.html

Manuel Rivas, 21 novembro 2008

Estamos nunha casa de Négrepelisse, na prefectura de Tarn et Garonne, no departamento Midi-Pyrinées, en Francia. É o día 6 de agosto de 1945. Un home escribe unha carta o 6 de agosto. Vai para trinta anos. Naceu en San Miguel de Mones, na aldea do concello de Petín, Ourense, o 18 de novembro de 1915. Mais no seu aspecto semella que pasou o século enteiro como unha apisoadora por riba del. Agora non. Xusto agora, non. Porque está a escribir unha carta.

Para el esa carta é máis importante que calquera outra cousa que se poida escribir. Moito máis importante que unha obra mestra. Talvez, de estabelecer algunha comparanza, a carta que escribe laboriosamente, porque non está afeito a escribir, porque leva moito tempo sen poder escribir, mesmo diriamos, e non sería esaxerado, que leva moito tempo sen vivir, pois esa carta, cunha letra que avanza a ritmo de buril en táboa de madeira, tería por título axeitado o de Á procura do tempo perdido, o que puxo Marcel Proust á súa magna obra.

Albino González, ao seu xeito, utiliza a técnica de Proust. Mais ten que ser cauto na expresión do seu lembrar, malia a escribir á persoa que máis quere no mundo. Escribe a María. Escribe a Ibiza. Non desexa lectores. Abonda con María. Sería un triunfo que María o lese. Mais el sabe que vai ter máis lectores. Lectores indesexábeis. Lectores secretos. Talvez apaixonados. Tan apaixonados que, esta tempada, en España, está de moda o andar á caza. Á caza do ser humano. Os da Censura Militar. Os da Censura Policial. Vai ti saber cantos lectores tivo a carta cando chegue a María, se é que chega a María. Porque María, pasado o tempo, é tamén un enigma.Iso é o que fai Albino González. O galego que vai para trinta anos que chegou a Négrepelisse e que se puxo a escribir unha carta. Este home silandeiro escoita o son da súa propia escrita como unha "voz baixa" da Historia humana. El tamén anda á procura do tempo perdido. Marcel Proust transformou a enerxía da memoria en tempo de pescuda. Lembrar sería un ir á procura. E iso transformou a narración. Xa non só se trataría de facer biografía ou reflectir o pasado. O tempo da novela xa sería un novo tempo. O presente que contén o pasado e que presinte o futuro.

Vexamos o que escribiu Albino:

"A mi inolvidable Marujita: Pienso que te extrañará mucho el recibir esta misiva mía tan tardía, pero la primera por la posibilidad.
Maruja, después de cuatro años te escribo estas líneas para que sepas solamente que aún vivo, y que vivo pensando en ti, en la lucha tan larga y dura que se me ha impuesto para vivir, no he olvidado por ello, el recuerdo de un ser que me ha sido siempre querido.
Yo pienso que te habrás casado o en todo lo mínimo te habrás ligado en amor a otro hombre, cosa que yo considero muy justa, si esto es así, no por ello olvido tu amistad ni tampoco debes hacerlo conmigo, y si por el contrario tu sigues aún queriéndome como yo a ti, espera poco más que días llenos de Felicidad que se aproximan para nosotros.
Dime algo del que como yo fue tan informtunado, tu papá. Cuéntame algo más que yo a ti, yo tengo historia pero no para hoy, dale besos de mi parte con el amor de hijo a tu mamá, a Anita y a Lidya, y recibe inolvidable María el eterno amor de Albino".


En Que é a literatura?, obra do 1948 que marcou durante anos o debate verbo do compromiso do escritor, Jean-Paul Sartre preguntábase por que e para que se escribe. Sabemos que Albino escribe a unha moza chamada María. Sabemos que escribe que á procura. Soña cunha noiva para o futuro. Mais hai un anaco na carta, unha febra deste tecido, que constitúe de seu un manifesto abraiante da condición humana, o agargalar nunha frase a realidade e o desexo. Albino condensa nesa frase todos os tempos e toda a experiencia do mundo. Sen nomealo, contén o horror. Sen citala, apoia na esperanza. Non hai ningunha grandilocuencia, ningunha retórica, ningún ornamento, mais a construción é perfecta, imposíbel de mellorar:

"Escribo estas líneas para que sepas solamente que aún vivo, y que vivo pensando en ti".

Son dezaseis verbas. Eis o porqué e o para quen. Se toda a linguaxe caera no Sil e as aureanas e aureáns que bateaban as augas co cunco para topar as pebidas de ouro tivesen que decantar unhas verbas, que máis quererían? Estou vivo e penso ti. Va que presta lanzar un xubiloso xuramento! Mais Albino escribe esta bomba informativa en voz baixa. Iso é o que leva facendo a humanidade perseguida dende sempre cando transmite a información esencial. Esa é a verdadeira Ars Poetica equivalente a como a define Archibald MacLeish:

"A poem should not mean
But be"

Dito ao xeito de Albino: O poema está vivo.

Quen era Albino González?

Un galego que loitara no Exército republicano, ferido de gravidade en Irún, e que se repuxera en Valencia, onde coñeceu a María Gómez cando ela tiña 16 anos. El volveu á fronte a loitar, pasou a Francia cando a caída de Cataluña e foi internado no penoso campo de Argelés. Cando a invasión nazi, Albino alistouse no exército francés. Detido polos alemáns, sufriu o destino de miles de españois republicanos. Os que levaban como marca o triángulo azul nos campos de exterminio nazis. Cando Franco e Serrano Súñer foron consultados polos xefes nazis sobre o destino destes españois recibiron a resposta de que os "verdadeiros" españois estaba en España. É dicir, estes dous grandes criminais non tiñan mortos dabondo no propio país senón que converteron en apátridas a miles de SP, os spaniards, heroicos españois nas gadoupas nazis. Albino foi levado ao inferno de Mauthausen co número de matrícula 4049. No mesmo convoi ía o ourensán Juan González del Valle, con número de matrícula 4054, logo deportado a Gusen, coa matrícula 9035, onde morrería gaseado o 26 de novembro de 1941. Albino sobreviviu en Mauthausen. Cando foi liberado o 5 de maio de 1945, día en que entrou o Exército dos Estados Unidos, era un dos responsábeis clandestinos da resistencia naquel inferno.

Algo sabiamos del polo que contara o fillo, Xesús González Gómez, sabio certamente en Ars Poetica e na historia das "voces baixas" da humanidade. Autor, entre outras pezas imprescindíbeis nunha biblioteca xerminal, de A lingua secreta. Entre nós, XGG. O valor dunha clave para protexerse do virus da amnesia. É el, XGG, quen agora publica no mesmo volume Cartas da noiva, de Albino González González, e El argonauta, de Juan Gómez Ripoll Campos(Edicions Documenta Balear). El argonauta é o comezo dunha novela truncada polo crime. O seu autor era Juan Gómez, o pai de María, pasado polas armas no cárcere provincial de Palma en 1942. Cando coñece a noticia da morte de Juan Gómez, Albino escribe a María: "Otros muchos conmigo juran ser vuestros padres, o relevar sus funciones, juran defenderos, juran sosteneros, y no hace falta jurar puesto que tú bien sabes quienes somos nosotros". Quen eran? As "voces baixas".